Kompleksi Memorial ZOD

Njerëzit janë të lidhur, tërhiqen dhe “rrënjosen” për vende dhe hapësira të caktuara, jo thjesht për paraqitjen e tyre formale apo estetike, por për domethënien që ato mbajnë dhe përçojnë tek ata, domethënie këto që krijojnë një komunikim dhe varësi të ndërsjellë në mes të njeriut dhe ambientit të ndërtuar apo atij natyror.

Ngjarjet të cilat lënë gjurmë në jetën e individit, shoqërisë dhe kombit, janë ato të cilat më së shumti e rrënjosin njeriun për një vend dhe tiparet e tij. Lufta e fundit në Kosovë la shumë gjurmë të pashlyeshme në jetën e njerëzve dhe në ambientin ku u zhvillua ajo. Konservimi dhe përçimi i këtyre memorieve si narrativa që thurin strukturat dhe eksponatet ekzistuese të kontekstit ku ka filluar dhe është zhvilluar Lufta dhe Qëndresa në Gllogjan, si dhe zhvillimi e ndërthurja e strukturave, memorialeve, instilacioneve dhe hapësirave të reja për ta konservuar, fuqizuar dhe përçuar këtë memorie tek gjeneratat e ardhshme, e po ashtu për t’i dhënë një shtytje ekonomike­­­ Gllogjanit përmes promovimit të turizmit, mbetet fokusi kryesor në propozimin tonë për Kompleksin Memorial – Historik të Shtabit të ZOD-it të UÇK-së në Gllogjan.